Moderatori: Shkëlqesia juaj! Ju keni fituar mirëbesimin e tre mbretërve të Saudisë: mbreti Fehd, Allahu e mëshiroftë, mbreti ‘AbdUllah, Allahu e mëshiroftë, dhe mbretit Selman, Allahu e ruajttë! Atëherë kush është burrë shteti?

Shejkh Salih Aal esh-Shejkh: Elhamdulilah… fjala burrë shteti, sipas përkufizimit akademik, ka një botëkuptim politik.

Por, pikësëpari, unë krenohem për mirëbesimin që kanë patur tek unë udhëheqësit tanë, Allahu e mëshiroftë mbretin Fehd dhe mbretin ‘AbdUllah, si dhe ja zgjattë Allahu jetën mbretit Selman, Allahu e ruajttë! Allahu e ndihmoftë hirësinë e tij, princin e Kurorës Muhamed ibën Selman, në çdo gjë të mirë!

Unë krenohem me këtë mirëbesim dhe për kohëzgjatjen e madhe që më kanë besuar mua dhe lus Allahun e Madhëruar e të Lartësuar që unë të jem meritor në kryerjen e amanetit për Zotin tim, në radhë të parë, pastaj për udhëheqësit e mi.

Burrë shteti, sipas botëkuptimit tim, duke marrë parasysh përkufizimet e njohura politike natyrisht, mirëpo unë po e zbatoj këtë fjalë në rastin e Mbretërisë së Arabisë Saudite: burrë shteti është ai që ka cilësitë e burrit të shtetit, ndryshe nga ai që punon në shtet.

Burrë shteti është pikësëpari ai i cili është i ndërgjegjshëm për interesat madhore të shtetit, është i ndërgjegjshëm për aktualitetin dhe gjendjen reale të shtetit, në aspektin e fuqisë dhe kontrollit, në aspektin e gjendjes së tij të brendshme, rajonale dhe ndërkombëtare.

Burri i shtetit i di interesat madhore të patjetërsueshme që ka shteti, në çfarëdolloj situate që të jetë, sado që të ndryshojnë qasjet.

Politika është arti i realizimit të së mundshmes. Ka edhe përkufizme të tjera për politikën, por në thelb ajo është arti i realizimit të së mundshmes, për çdo kohë e për çdo vend, në varësi të nevojave që kanë njerëzit.

Burri i shtetit është njohës i mirë i artit të realizimit të së mundshmes, njeh mirë atë që është e disponueshme dhe atë që është e padisponueshme, e njeh mirë fuqinë dhe përdorimin e saj, e me të gjitha këto, ai njeh shumë mirë sistemin qeverisës mbi të cilin është ngritur shteti.

Kemi sistemin themelor të qeverisjes, i cili ka mbetur sistemi themelor qeverisës për të gjithë mbretërit. Kështu që, burri i shtetit angazhohet me dy elemente bazë që përbëjnë botëkuptimin e tij rreth shtetit:

1 – Elementi i pandryshueshëm,  që është sistemi themelor i qeverisjes;

2 – Elementi dinamik, që përbëhet nga udhëzimet të cilat jepen nga udhëheqësit: ose për sa i përket shpjegimit të sistemit themelor, ose mund të jetë rreth detajeve dhe imtësive të sistemit themelor; ose mund të jenë udhëzime për sa i përket rrethanave specifike, aktuale dhe vendim-marrjeve.

Ai duhet patjetër që të jetë i aftë për të zhvilluar debat konstruktiv, në mënyrë që të fitojë opinionin e njerëzve në favor të shtetit të tij.

Shteti ynë lavdi Allahu është shtet islam, është shtet i fortë. Na kanë mësuar udhëheqësit tanë që ky është një shtet i fuqishëm, sidomos në këtë epokë të ndritur. Ata na kanë mësuar se ky është shtet i fuqishëm, prandaj ne duhet ta ndjejmë në vetet tona këtë realitet.

Kështu pra, burri i shtetit duhet të jetë i zoti në debat.

Pika e fundit është se, burri i shtetit duhet të dijë se si të fitojë opinionin e njerëzve në favor të shtetit të tij sepse shteti jonë është shtet islam, është kibleja e muslimanëve, prandaj ai duhet të dijë se si të fitojë opinionin e njerëzve. Si për shembull, dijetari apo fekihu apo nxënësi i dijes apo kuadrot fetarë e ligjorë, të gjithë duhet të dijnë patjetër se si të fitojnë opinionin e njerëzve në këtë aspekt.

Gjithashtu, burri i shtetit që merret me politikën, edhe ai duhet të dijë se si të fitojë opinionin e njerëzve në këtë aspekt.

Edhe burri i shtetit që merret me ekonominë e di se cilat janë interesat madhore të shtetit, se si duhet të fitojë opinionin e njerëzve, si duhet të debatojë e kështu me radhë.

 

Përktheu: Alban Malaj