Në politikë, kërkohet të bësh balans mes ekzagjerimit në përfshirjen në të dhe braktisjes totale të saj. Shumë njerëz mendojnë se duke parë stacione televizive apo duke lexuar artikuj në gazetë, bëhen të aftë të analizojnë çështjet. Politika është e vështirë edhe për ata që kanë institucione të mëdha që u sigurojnë atyre informacione dhe kanë pajisjet e nevojshme për të monitoruar aktualitetin.
Pra, çështja e politikës nuk është aq e lehtë saqë të gjykojnë në të individë nga shoqëria e thjeshtë, të cilët thonë se filan çështja ka këtë gjykim e filan problemi duhet të shikohet nga ky këndvështrim.
Kështu pra, obligimi është që ne të jemi mesatarë për sa i përket çështjes së politikës. Çështjet e politikës kërkohet të kuptohen, por ti e ke obligim që zgjidhjen e çështjeve politike t’ia besosh udhëheqësit, t’ia besosh atij që ka kompetencën për këtë punë, sepse ai ka pajisjet e duhura, ka analizën dhe perceptimin e duhur për interesat e Umetit, të cilat nuk i kanë individët në shoqëri.
Kush shqyrton ndonjë artikull në gazetë apo shikon ndonjë stacion televiziv, pastaj e vendos veten e tij drejtues të çështjeve politike, e nxjerr veten e tij sikur vetëm ai e ka dertin për hallet e Umetit e të tjerët nuk e kanë - atëherë ky njeri e ka ekzagjeruar dhe e ka lënë rrugën mesatare në politikë.
Për sa i përket rrugës mesatare në politikë, mes kuptimit dhe të qenit i bindur plotësisht, dije se jo çdo çështje në politikë mund të arrish ta kuptosh. Ti mund të përpiqesh të kuptosh, por nuk e arrin dot bindjen e plotë.
Për sa i përket rrugës mesatare në politikë në çështjen e akuzimit të pakufizuar dhe justifikimit të pakufizuar, ka njerëz që e ekzagjerojnë me akuzime, akuzojnë menjëherë sapo u vjen ndërmend ndonjë mendim! Nga ana tjetër gjithashtu, ka njerëz që justifikojnë për çdo gjë! Kurse njeriu që ka logjikë, ka perceptim, dijetari, nxënësi i dijes, ai që është në hak, ai që ndjek rrugën mesatare, mes akuzimit dhe justifikimit - është njeri që kupton drejt dhe i percepton çështjet dhe i di pikat thelbësore të çështjeve.
Përktheu: Alban Malaj